Tuesday, May 31, 2016

'വിമര്‍ശം' 'വിമര്‍ശനം'

?:'വിമര്‍ശം' എന്നും 'വിമര്‍ശനം' എന്നും പ്രയോഗിച്ചു കാണാറുണ്ട്, ഇതിലേതാ ശരി? രണ്ടും ശരിയാണെങ്കില്‍ എന്താണ് വ്യത്യാസം ?
Athul JSOctober 1, 2014
?:വിമർശം- വിമർശനം : ഏതാണ് ശരിയായ പ്രയോഗം?
ഉദാ. വി. എസ്സിന് പീ ബീ യിൽ വിമർശം / വിമർശനം.
Vijaikumar Divakaran NellayikunnamJanuary 18 ,2016 
::രണ്ടും സാധുവായ വാക്കുകളാണു്. ഗൃഹ പ്രവേശം,ഗൃഹ പ്രവേശനം, സ്മരം, സ്മരണം ഇവയൊക്കെ സമാനമായ ജോടികൾ ആണ്.പൊതുവേ, അം എന്നവസാനിക്കുന്ന ഒരു വാക്കു് ഗുണനാമമാണെങ്കിൽ അതിനോട് -അനം ചേരുമ്പോൾ ആ ഗുണം സൃഷ്ടിക്കുന്ന ക്രിയ എന്നു പറയാം.
ഉദാ: വിമർശം (വിമർശിക്കപ്പെട്ട് എഴുതിയ ഒരു കൃതി/ലേഖനം), വിമർശനം - അത്തരം ലേഖനം/കൃതി രചിക്കുക എന്ന ക്രിയ.
സ്മരണവും സാധുവായ ഒരു വാക്കാണു്. സാധാരണയായി നാം അധികം ഉപയോഗിക്കാറില്ലെങ്കിലും.
സ്മരം = ഓർമ്മ എന്ന ഗുണനാമം.
സ്മരണം = സ്മരണ = ഓർമ്മ, ഓർമ്മിക്കുക എന്ന ക്രിയ.
സ്മാരണം = ഓർമ്മിപ്പിക്കുക എന്ന ക്രിയ.
എന്നാൽ സ്മിതം, സ്മേരം= പുഞ്ചിരി.

അനുസ്മരണം = (പതിവായി/പലപ്പോഴായി) ഓർമ്മിച്ചുകൊണ്ടിരിക്കുക എന്ന പ്രവൃത്തി.


പുതിയ വീട്ടിലേക്കു് ആദ്യമായി കടന്നുകയറി താമസിക്കുന്ന ചടങ്ങ് ‘ഗൃഹപ്രവേശം’.
ഏതെങ്കിലും വീട്ടിലേക്കു് എപ്പോഴെങ്കിലും പ്രവേശിക്കുന്ന ക്രിയയെ ഗൃഹപ്രവേശനം എന്നും പറയാം.
ഡോ. പുതുശ്ശേരി രാമചന്ദ്രൻ ഒരുക്കിക്കൂട്ടിയ 'കേരളപാണിനീയവിമർശം' എന്ന സുപ്രധാനഭാഷാഗ്രന്ഥത്തെക്കുറിച്ചു കേട്ടിട്ടുണ്ടായിരിക്കുമല്ലോ അല്ലേ?

വിമർശിക്കുക എന്നതൊരു ക്രിയ. ആ ക്രിയയുടെ പേരു് (ക്രിയാനാമം) വിമർശനം. അങ്ങനെ വിമർശനം ചെയ്തു കിട്ടുന്ന കൃതി (ആ വിമർശനകൃതി) വിമർശം.

ഗൃഹത്തിൽ പ്രവേശിക്കുക എന്നതൊരു ക്രിയ. ആ ക്രിയയുടെ നാമം ഗൃഹപ്രവേശനം. അങ്ങനെ പ്രവേശിക്കുന്നതു് പ്രത്യേകം ഒരു സംഭവം / ചടങ്ങ് / കർമ്മം ആണെങ്കിൽ അതു ഗൃഹപ്രവേശം.

വാക്യത്തിൽ പ്രയോഗിക്കുമ്പോൾ:
"ശങ്കരന്റെ ആ കവിതയെ സുകുമാരൻ നിശിതമായി വിമർശനം നടത്തുകയുണ്ടായി. പ്രസ്തുത വിമർശമാണു് 'കെട്ട വിളക്കുകൾ' എന്ന കൃതി."
Viswa Prabha
 
October 1, 2014
·